Del Nora Oriella

Vivo desnudu,

como nací.

Nun ye que tenga

na qu´enseñar,

ye que nun tengo

na qu´esconder.

 

Vivo desnudu,

col corazón nun puñu,

ensin medir na,

cola cabeza ergía,

cola mio verdá

por bandera.

 

Vivo desnudu,

dando lo que soi,

ensin ocultar na,

siendo yo mesmu,

ensin pesllar nenguna puerta.

 

Vivo desnudu,

ensin escudu,

intuyendo corazones

atormentaos per

esti mundu.

Vivo desnudu.

corona espines

del cinismu d´un

mundu adormecíu

po la comodidá.

 

Vivo desnudu,

co la idea d´iguar,

dende lo pequeñu,

les desigualdaes

del mundu.

 

Vivo desnudu,

pa ser yo mesmu

nun mundu desnaturalizau,

pagau de si mesmu,

qu´iñora al restu.

 

Vivo desnudu,

pa no ser complice

de conxures maniquees,

de mentires disfrazaes,

de verdaes prostituies.

 

Vivo desnudu

pa poer amar

a tumba abierta

a daquien quiera

compartir un suañu.

Vivo desnudu

porque toavía amo

al xeneru humanu,

ensin saber bien

el porque.

Fiya lexítima la llibertá,

hermana la tristura,

compañera fiel del amor propiu.

 

Cuantes veces compañía

mi ficisti, aún en sin

deseala

 

Cuantes nueches calentasti

la mio almohada,

inclusu en compañía

 

Cuantos díes acompañasti

los mios pasos,

camín de la na.

 

Nun pueo dexate,

porque yes parte

la mio alma;

 

Yes certeza nes

gores la duda,

faruta pa la mio gula;

 

Destinu intuiu

dende que los xuegos

dexaron pasu al pensamientu.

Yera mirala y sentir

tol cuerpu arder,

como ensin fuere

yesca

 

Yera imaxinala y sentir

nos pantalones el Cañón

Les Piragues, enantes

dar la salía

 

Yera oyir la so voz

ya embriagame ternura.

Mirar los sos güeyos

ya inundame la dolzora.

 

Yera dir a vela

ya ponesemi´l corazón

A tocar los cuartos

la nuechivieya.

 

Yera tocame,

ya ponéseme los pelos

como escarpies.

 

Nun m´importaba

si aquello yera amor o non:

Solu quería vivilo,

ensin desmayu nin tregua.

Asina fasta morrir

n´aquel tayu.

Tristura pola ausencia

los tos güeyos reflexaos

na pupíla los mios güeyos

 

Tristura pola ausencia

los tos besos nunca daos

na mio avariciosa boca

 

Tristura polos secretos

enxamás contaos

de la to alma atormentá

 

Tristura poles tos rises

nun compartíes

qu´allegraron otros güeyos

 

Tristura pola ternura

que nun-y regalasti

a quien ti la pedía

 

Tristura por l´agua clara

D´una fonte d´amor

llimpia y clara

que baxa sola

fasta pérdese nel mar

Y quísila.

Quísila desesperadamente;

cola renuncia por bandera.

 

Cola desesperanza

por futuru,

cola entrega

por testamentu.

 

Con l´amor

como mensaxe;

cola xenerosidá

como exemplu.

 

Por ver si pues

facer feliz a dalguien

ensin camudalu

ya ensin batalles.

 

Ya poder pensar un díe

qu´esti monumentu

punxelu yo.

Con eso, tengo bastante